رواية اللعنة (5)

( 5 ) 

ضحك بصوته المبحوح قليلاً و قال هو يعطني لكمه خفيفه في كتفي

-         هو انت ؟ ... يا شيخ خضتني .. انا قلت حرامي

نظرت لسعد غير مصدق عيني ، أنه لم يأتي في أي من جنازتين والدته فمتي حضر ؟

- انت جيت امتي يا سعد ؟

- النهارده الصبح

- و متصلتش بيا ليه

- كنت هتصل بس كنت تعبان قوي ، وصلت نمت علي طول و صحيت علي صوت كركبتك،  كنت بتعمل ايه ؟

- هحكيلك علي كل حاجه بس قولي الأول .. انت ازاي متجيش جنازه مامتك ؟

- مهي ظروف البلد وقفت الطيران قال ايه اضراب فاتحبست ترانزيت يومين في بلد معرفش اهلها بيتكلموا ازاي لغايه ما اتفك الحصار ؟

- يومين ؟ امك ميته بقالها فتره

- و هو حد فيكم فكر يبعتلي يقولي ، ده انا بتصل بيها زي عادتي كل اسبوع لقيتها مبتردش و معرفش لأبويا رقم و دخت عقبال ما وصلت لناديه و نهي و الاتنين كانوا زيي مهي العيله حبلها اتفرط خلاص بس المهم اني خدت رقم باباك منهم و اتصلت بيه فندي اختك هي اللي حكيتلي كل حاجه و بصراحه اتصدمت .. انا كنت عارف ان امي مكتأبه ووحيده و كنت بحاول اخفف عنها بتليفوني الاسبوعي بس متخيلتش ابدا ان الموضوع ممكن يوصل معاها

للأنتحار .

- مش عارف يا سعد ... في حاجات مش تمام في الموضوع ده

- لأ براحه عليا ... بص تعالي نعمل شاي و نتكلم و تحكيلي الموضوع من الأول و تفهمني

- يبقي تيجي عندنا و علشان نعرف نتكلم كويس بعيد عن حفرة الذكريات المتربة دي

............................................................................................................

تجلس ندي بالقرب من والدتها ثم تقترب بشده من أذنها  تهمس في اذنها

- ماما أحمد عمال بيلف و انا مش قادره اسكت اكتر من كده ، اللي مسكتني اني خايفه من رد فعله ، مش هيسامح بابا أبدا .

يدخل عادل من الباب و ينظر لأخته بعيون متسائلة

- أنتِ بجد مصدقه أنها بتسمعنا يا ندي ؟

تعتدل ندي و تنظر لأخيها الصغير بحنان

- اه اكيد .. بكره لما تصحي هتلاقيها بتحكيلنا كل اللي قولناه

- بجد .. طيب يا ماما سعد رجع و أخد سريري .. هو مش عندُه سرير في بيته ؟

- عيب يا عادل ، اسمه اونكل عادل ده قد أحمد

- مهو انا زعلان كمان من ابيه احمد

- ليه يا عادل ؟

ينظر لأمه الراقده و تدمع عينه فتأخذه ندي في حضنها

- لأ يا عادل .. ماما تعبت علشان ربنا كتب كده و محدش سبب في ده .. ادعيلها بس تفوق بسرعه

- مهو لو كان موجود هو ولا بابا كان لحقها

- و يسيبوا عمتو يعني ؟.

- مهي كانت ماتت بقي .. انا كنت بخاف منها اصلا

- ادعي لربنا يا عادل يخفف ماما و يرحم عمتو و متكلمش تاني كده

- حاضر

............................................................................................................

-  الواد ابو عيون زُرق ده هيجنني ... ازاي يبقي في صوره قديمه ليه و هو صغير مع أمي و أمك و أختي و منعرفش عنه حاجه ... انا مكنتش هعرفه لولا عنيه المميزين دي

- سيبك منه .. انت قلت كان في ورقه مع الصوره ، فينها

- انت جدع .. انا كنت نسيتها اصلا

- فالح

- انا معايا ورق كتير من عندكم في البيت كمان

- ده انت قلّبتنا بقي

- انا مخدتش غير الورق يا سعد علشان افهم امك ماتت ازاي

- خلاص متزعلش كده انا كنت بهرج معاك ، هات الورقه اللي كانت مع الصورة الاول و بعدين نشوف الباقي

يعبث أحمد في جيبه ثم يخرج ورقه بيضاء مطويه عده مرات و يفتحها برفق فيخطفها سعد و يفتحها بسرعه و يقرأ بصوت عال غير مبال بأعتراض أحمد

- صغيري .. كم تمنيت أن اصارحك و لكنك لطالما كنت بعيد و منزوي تبكي حظك السئ و الذي لم يكن في يدينا شئ لتغييره فمفتاحك معك و عليك أن تجده بذاتك  ، و حين تجده عليك أن تعلم أنك مثلنا و لكن لسنا كلنا كذلك و هناك منا من ينكر ما ستجده او يحاربه او لا يدرك كيف يتعامل معه و هناك من ليس منا سيحسدك عما لديك  وسيبحث دائماً عن وسيله لأقناعك أنك ملعون و سيقلب حياتك جحيم أزرق فأنتبه . و قد تركت لك ملاكاً مثلك و لكن واسع الأفق ليدلك عما تبحث عنه و لكن لن تعرفه إلا حين تجد مفتاحك ، فأحذر يا صغيري ... أمك نبيلة .

-منزوي و مفتاح و جحيم ؟

- لأ و في ملاك كمان شوف الهنا

- بطل تريقه بس ، بزمتك أنت فهمت حاجه ؟

- اه فهمت ، أمك بتقولك أعمل نسخه علي مفتاح البيت

- يا شيخ أتلهي ... من أمتي أمي بتمضي بأسمها

- و أنت كنت بتقرا الجوابات اللي هي بتبعتها لحد علشان تعرف هي بتمضي بأيه ؟

- صح .. بس هي لما بيبقي في حد جايب جواب و لا أي حاجه كانت بتخليني أنا او اختي اللي نستلم و نمضي

- طيب قوم دور علي اي جوابات تانيه ليها لأي حد

- أنا قلبت الشقه و مقابلنيش حاجه زي كده ، كمان هي أمي سابت الجواب تحت مخدتي ده من قد ايه ؟

- اسأل نفسك .. هو مين بيروق الاوضه هنا ؟

-  ماما أو ندي

يسمعا طرقات علي الباب و تدخل ندي لتدعوهم للغداء و تخرج في صمت بعد أن أحمرت وجنتيها حين التقت عيناها بعين سعد .

- مش كنا جيبنا سيره عشره جنيه

- و انت كنت هتعمل ايه بالعشره جنيه يعني ، اكيد هتجيب أكل و ادي الاكل جه يلا قوم .

............................................................................................................

 يجلس الفتي ذو العينين الفاتحتين في كرسي بجانب سرير نبيله "الأم" مرتدياً معطف الطبيب و ينظر لها شذراً 

- انتِ أزاي طاوعك قلبك تعملي كده في أبنك ، ده لو حد غريب مكنتيش هتتعاملي بالقسوة دي ، و ازاي قدرتي تتعايشي مع بابا و هو ناكر شئ لما اشتركت انا معاه في نكرانه نكرني انا . بجد مش هسامحك

نزع المعطف و ألقاه علي الكرسي الذي كان يجلس عليه و خرج من الغرفه في هدوء كظيم كالذي يسبق العاصفه و لم تمر لحظات  وأرتفع صوت الجهاز الموصل بنبيله في اشاره تحذيريه لتناقص دقات القلب بشكل متدهور و سريع اسرع من استجابه الاطباء و جريهم نحو الغرفه بجهاز الانعاش الكهربائي حتي اصبح الصوت صفاره متواصله لا تدل سوي علي النهاية